Tá an taispeántas ‘Curacha’ a ghlac samhlaíocht na gcuairteoirí ar Inis Oirr an samhradh ar fad tar éis taisteal go campas OÉ Gaillimh chun comhpháirtíocht nua a sheoladh go hoifigiúil idir Áras Éanna Ionad Ealaíne agus an Ollscoil.

Fanfaidh 20 de na curacha ar taispeáint sa Chearnóg in OÉ Gaillimh go dtí an 10ú Deireadh Fómhair, agus tabharfar cuireadh don phobal cuairt a thabhairt agus gan ghá áirithint a dhéanamh roimh ré.

Tá an 21ú curach, leis an ealaíontóir Kathleen Furey atá lonnaithe in Uachtar Ard, ar taispeáint taobh istigh d’Ardeaglais na Gaillimhe.

Bhí ómós Kathleen d’fhuinneog gloine dhaite le Harry Clarke ar taispeáint taobh istigh den séipéal le linn dhá mhí an taispeántais chun 21ú breithlá Áras Éanna a cheiliúradh ar Inis Oirr.

Sa chomhpháirtíocht nua idir OÉ Gaillimh agus Áras Éanna, oibreoidh an Ollscoil agus an t-ionad ealaíne le chéile chun na hoileáin agus an tIarthar a chur chun cinn níos ginearálta mar áiteanna cultúir, foghlama agus taighde.

Tá ciste nua curtha ar bun ag an Ollscoil chun tacú le baill foirne agus le mic léinn ar mian leo taisteal chuig an oileán agus na háiseanna ag Áras Éanna a úsáid mar chuid dá gcuid staidéir.

“Tá ríméad orm gur tháinig 21 curach ar an gcampas chun an chomhpháirtíocht nua idir an Ollscoil agus Áras Éanna a lainseáil,” a dúirt an tOllamh Ciarán Ó hÓgartaigh, Uachtarán OÉ Gaillimh.

Dúirt Stiúrthóir Ealaíne Áras Éanna, Dara Mac Aoidh, go raibh an-áthas air go bhfeicfeadh an pobal i gcoitinne i nGaillimh an taispeántas rathúil a chuir áthas ar oileánaigh agus cuairteoirí ar Inis Oirr ó lár mhí Iúil.

“Cuirimid fáilte roimh an gcomhpháirtíocht nua seo idir an Ollscoil agus Áras Éanna, agus táimid ag tnúth le bheith ag obair ar go leor comhoibrithe agus tionscadal sa todhchaí a rachaidh chun leasa na hOllscoile agus oileán Inis Oírr,” a dúirt sé.

Ba iad na healaíontóirí ar tugadh cuireadh dóibh páirt a ghlacadh ná Dolores Lyne, Alannah Robins, Naoise Sheridan, Áine Philips, Sean O Flaithearta, Margot Quinn, Pat Quinn, Ger Sweeney, Mick O’Dea, Kathleen Furey, Jennifer Cunnigham agus Tim Acheson, Dara McGee, Breda Burns, John Behan RHA, Sadia Shoaib, Daniel Coleman, Sean Cathal O Coileán, Tom Meskell, Jay Murphy, Cathal McGinely, agus Deirdre McKenna.

Tá póstaeir don taispeántas ar díol i Siopa Leabhar Charlie Byrne, Middle Street, agus sa Old Seadog ar Cross Street i gCathair na Gaillimhe.

* Focail agus grianghraif le Ciaran Tierney Digital Storyteller.

 

Ómós d’ár stair ghlórmhar:

https://aras-eanna.ie/omos-dar-stair-ghlormhar/